NH 44-ah lirthei an tangkhang mek

Hun rei tak chhung ruah a sur tawh avangin National Highway 44 chu zawh hleih theih lohin a awm mek a, Truck leh lirthei eng emaw zat an tangkhang mek. Assam-Tripura inkarah hian ruahsur vangin leimin a awm nual a, kawng a chhiat bawk avangin harsatna a thleng mek.

Lirthei tangkhang avang hian lirthei khalhtute chuan harsatna an tawk nasa hle a, ei tur an tlakchham bakah tui in tur an nei mumal tawh lo nia tarlan a ni. Lirthei khaltu Sukhdev Singh chuan, "Tripura pan hian ni 15 liam ta khan Hyderabad aṭangin ka chhuak a, kawng a chhiat em avang leh siam ṭhat a nih loh avangin harasatna kan tawk nasa hle. Tui in tur kan tlachham a, hun rei tak chhung kan inbual tawh lo bawka kan mangang tawh tak zet. Lirthei che sawn thei loa intlar hi sang chuang zet a awm a, chu chuan kawngpui km 7 vel bawr a awh a ni" a ti.

National Highway 44 hian ngaihsak a hlawh lo hle a, mi tam tak chuan kum hnih thum kal ta ai khan tuna a dinhmun chu a chhiat zawk thu an sawi. State sorkar chuan kawngpui chei tur hian hma la ve bawk mah se kawng hrang hrangah harsatna a tawk a, ruahtui a tlak ve reng bawk avangin an harsatna tawh mek hian hun rei zawk a la luah dawn niin a lang. Tripura PWD Minister Badal Chowdhury chuan ziakin an harsatna tawh mek chu Union Road Transport and Highways Minister Nitin Gadkari hnenah a thawn a, hmalakpui thuai turin a ngen. Minister chuan nitin mamawh lak khawm kawngah harsatna an tawk tih sawiin, oil, fuel, LPG leh thil dangah te mipuiten harsatna an tawk mek a ni a ti. Chowdhury hian an harsatna tawh mek chunchangah hian Assam PWD Minister Parimal Suklabaidya chu a lo hmu tawh bawk. NH 44 hi Ministry of Road Transport & Highways chuan National Highways and Infrastructure Development Corporation kutah a dah a ni.

Tripura BJP President Biplab Deb leh Assam CM Sarbananda Sonowal te chuan he mi chungchanga hmalak dan tur an lo sawi dun tawh bawk a, Assam Chief Minister hian a hmunah kalin harsatna thlen dan hi a en a ni a, ani bakah hian Karimganj DC Manoj Kumar Deka chuan he hmun hi a tlawh ve bawk. Deka chuan, kawng chu a chhiat tak zet thu sawiin, siam ṭhat thuai a nih loh chuan harsatna nasa zawk an tawh theih thu a sawi. NH 44 hi Tripura state mamawh lakkhawmna kawngpui ber a nih avangin tuna an harsatna tawh hian mipui a nghawng na hle a, thil man a sang chho zel bawk.