Assam-ah File Tracking System hman a ni dawn

Assam state-a sorkar thar a pian hnuah kawng hrang hrangin hmalakna a kal chho mek a, tunhnai khan state sorkar chuan sorkar langtlang dinna kawnga a hmalakna pakhat atan File Tracking System hman a nih tur thu a puang.

File Tracking System hi Finance departmen-ah hman phawt a ni ang a, department dangah hman chhunzawm a ni ang. Finance Minister Himanta Biswa Sarma leh Chief Minister Sarbananda Sonowal te chuan Zirtawpni khan he mi chungchangah hian Guwahati-ah meeting an nei a ni. Finance department-ah hian budget siam leh sem darhna turin ‘on-line system' hman a ni dawn bawk a, sum khawih chetna atan ‘e-Kuber’ hman a nih tur thu tarlan a ni bawk. ‘On-line system’ hmang hian sorkar hnathawk hlawh leh bill te chu siam a ni ang a, kawng hrang hrangah ṭangkai taka hman a ni ang. Chief Minister chuan thiamna sang zawk hmangin tourism lamah ṭan lak a ngaih thu sawiin, wildlife, cultural heritage, tea and rural tourism, sports leh river tourism te chu chawisan zel a ṭul thu a sawi bawk.