Bangladesh aṭangin Tripura-ah bungrua lakluh a ni

Hun rei tak chhung National Highway 44 kaltlang theih loha a awm hnuah Bangladesh kaltlangin bungrua te chu Tripura-ah lakluh a nih thu Tripura Revenue leh PWD Minister Badal Chowdhury chuan a sawi.

Food Corporation of India leh Indian Oil Corporation te chuan bungrua, oil leh buhfaite Bangladesh kaltlanga chawlut tur hian hma a la a ni. Guwahati-Dawki-Dharmanagar kawngpui aṭangin bungrua te hi Bangladesh Ashuganj river port thlenpui an ni a, heta ṭang hian Tripura-ah thawn luh leh a ni. National Highway (NH-8) chu thla khat chuang ruahsur leh leimin avang tein kal tlang theih lohin a awm mek bawk a, state sorkar chuan IOC leh FCI te chu Bangladesh kaltlanga petrol leh diesel bakah mawmawh dangte thawn lut tur hian a lo ngen tawh a ni.

Kum 2015 khan Bangladesh sorkar chuan Ashuganj river port leh Bangladesh highways kal tlanga Tripura bungraw thawnluh hi a lo remtihsak tawh bawk. Tripura Chief Minister Manik Sarkar chuan kar kalta Zirtawpni khan emergency meeting koin, PWD Minister, IOC, FCI, railways, PWD leh transport department aiawh te chuan hmalak dan tur an rel a ni.

Chowdhury chuan, “Sorkar laipui leh Assam sorkar te chuan NH-8 siam ṭhat hna chu an ngaihthah a, sorkar laipui chuan hei ai hian hmarchhak huam chhunga inkalpawhna kawngpui te hi ngaihsak chu ni se harsatna lian zawk a thleng lo tur a ni" a ti. Inrinni khan NH kaltlang theih loha awm mek hi National Highway Infrastructure Development Corporation, Tripura leh Assam PWD department ten a hmunah kalin harsatna tawh mek sutkian dan an ngaihtuah a ni.

Union Road Transport and Highways Minister Nitin Gadkari chuan, NH-8 siam ṭha tur hian hmalak mek a ni a ti a, rel kawng a tlang loh bawk avangin mipuite harsatna sukiang tura chak taka hmalak a nih thu a sawi. Tripura-ah hian petrol pump 60 vel zet te chuan hunrei tak chhung mipui hnena pek chhuah tur an nei tawh lo a, a nei chhun te chuan litre khat Rs 200-250 ten an hralh a ni. Hmarchhak state te innghahna leh chakkhai lamna ber National Highway te kaltlang theih loha a awm hian mipuite chuan harsatna nasa tak kan tawk ṭhin a, chu thil chu kan kan tawng mek a ni Chowdhury chuan a ti. Northeast Frontier Railways Chief Administrative Officer Ajit Pandit chuan, kar khat chhungin rel te chu dan pangngaia an tlan leh theih beisei a ni a ti a, hnathawktute chuan chhun zan zawma hna an thawh thu a sawi bawk.