BRICS Youth Summit 2016 zawh fel a ni ta

Ni thum awh BRICS Youth Summit 2016 Guwahati-a neih chu Pathianni khan a ṭiak ta. He summit-ah hian BRICS member ram Brazil, Russia, India, China leh South Africa te aṭangin palai 60 vel an fuankhawm a ni.

BRICS Youth Summit-ah hian ṭhalai te mawhphurhna leh sorkara thuk zawka an inhman theihna lam ngaih pawimawh a ni a, Sustainable Development Goals (SDGs) a hlawhtlin theih nan an mawhphurhna te tarlan a ni. Skill development leh entrepreneurship lamah ṭhalai te nasa zawka hma kan sawn theihna tur lam hawi sawiho a ni a, sumdawnna lam thlenga hmasawnna tur te tarlan a ni. Small and Medium Enterprise lamah training tam zawk buatsaih te, education leh healthcare lam te zirho a nih bakah BRICS Social Science Youth Research Network ṭangkai zawka hman a nih theihna turte sawiho a ni bawk.

Summit chuan ṭhalai tam zawk sorkara an intahluh theih nan BRICS Summer School din an rel a, BRICS ram te tan New Development Bank aṭanga sum hmuh theih te dapchhuah an rel bawk. He summit ni thum awhah hian Skill Development and Entrepreneurship, Social Inclusion, Youth Volunteerism leh Youth Participation te chu an thupui ber a ni.