SKorea Ambassador-in inzawmna ṭha zawk neih a duh

Republic of Korea tana India rama ambassador ni lai Cho Hyun chuan ram pahnih ten kawng hrang hranga thawh dunna ṭha zawk neih a duh thu sawiin, he mi tihlawhtling tur hian hmarchhak chu hmun pawimawh a nih thu a sawi.

Indian Chamber of Commerce (ICC) buatsaihin Ningani khan Guwahati-ah Industry lama hmasawnna tur te sawihona hun hman a ni a, he huna tel Hyun chuan, South Korea leh hmarchhak te chuan inzawmna ṭha zawk an neih a ngai a ni a ti a, he mi tur hian student exchange program pawh kalpui a duh thu a sawi. Ram pahnih ten kawng hrang hranga inzawmna an neih theih nan tourism chu thil pawimawh tak a ni a ti a, chu chuan kawng tam takah hmasawnna a thlen dawn a ni a ti. Inkalpawhna ṭha zawk a awm chuan tourism-in hma a sawn dawn a ni a ti a, art, cinema, education leh medical tourism te chu ram pahnihte inlaichinna ṭha thlen theitu a ni a ti bawk.

Assam additional chief secretary V S Bhaskar chuan SKorea nena inzawmna nei tur hian tourism, education leh healthcare te chu thil pawimawh tak a ni a ti ve bawk. Industries department commissioner Swapnanil Baruah pawhin technology lamah SKorea nen thawhdunna an nei mek tih sawiin, anni puihna hian state silk industry chu kalpui mek a ni a ti.