Assam-ah kut hnathawktute tan ruahmanna thar siam a ni

Assam Agriculture minister Atul Bora chuan Pathianni khan press conference koin, state sorkar-in agriculture, urban development leh veterinary sector-a hmachhawp a neih te a puang. Kut hnathawka ei zawng te tan Soil health card siam a nih tur thu sawiin, cold storage din tura hmalak mek a ni a ti a, thlai chi sem chhuah kawngah e-tendering hawn a nih tur thu a sawi bawk.

Minister chuan, kut hnathawka ei zawng te tan state sorkar chuan farmer identity card a siam mek a, mi 30,000 te hnenah soil health card ni za chhunga sem hman beisei a nih thu a sawi. Heng ruahmanna hrang hrang te hian kut hnathawka eizawng mi 22 vel zet te tan kawng tam taka hamṭhatna a siamsak beisei a nih thu Agriculture minister Atul Bora chuan a sawi. Infrastructure lama hmalakna atan Jorhat-ah cold storage din tum a nih thu sawiin, hei bakah hian North Lakhimpur-ah commercial complex leh truck terminal te din tura hmalak mek a ni a ti.

Veterinary sector lama sorkar hmachhawp te tarlangin, poultry farm 22 zinga pali Sonitpur, Nalbari, Jorhat leh Kamrup-a mi te chu mimal kutah hlan tum a ni a ti a, vawk vulhna hmunpui Majuli, Bokakhat, Jonai leh Dhemaji-ah te din a nih tur thu a sawi bawk.