Assam : DSU-in autonomous state ngiatin nawrh huaihawt

Dimasa Student Union (DSU) chuan Haflong, Assam-ah rorelna hran siamsak ngiatin sit-in protest an huaihawt. DSU hian Karbi Anglong leh Dima Hasao district-a sixth schedule area huam telin 'autonomous state' siamsak an ngiat a ni.

DSU hian India danpuia Article 244A hman an phut a, hemi hmang hian autonomous state siamsak an ngiat a, Article 244A hi 22nd Constitutional Amendment Act, 1969-in India danpuiah dah lutin, Assam huam chhunga tribal-te ram chinah 'autonomous state' siam a phalsak. Sixth schedule hnuaia autonomous council aia thunei zawk niin dan leh hrai kenkawh thlengin thuneihna an nei thei a ni. Hemi bakah hian autonomous state huam chhung enkawl turin local legislature emaw Council of Ministers thlenga siam a phalsak bawk.

DSU hnuaia nawrh huaihawtah hian rorelna hran an duhna thuziakte kengin mipuite chu 'Autonomous state pek kan nih hma loh chuan kan chawl lo ang" tih leh, "Article 244A hi India dan hnuai a kan dikna chanvo a ni" tiin an au rual a ni.

Pramith Sengyung, DSU general secretary chuan political party-te chu thu tiam hlen loah puhin, sorkarna an chan hnuah Article 244A hman chu an theihnghilh zui mai ṭhin tih a sawi. An thil ngiat chu tun hnai mai aṭang ni loin kum 33 liam ta chhunga an ngiat tawh a ni tih a sawi a, state leh sorkar laipui chuan a tihlawhtling turin hmalakna mumal an nei ngai lo a ni, a ti.

Sengyun chuan Sixth Schedule hnuaia awmte thuneihna a tlem zel tih sawiin, Karbi Anglong leh Dima Hasao district-a tribal chengte humhim turin autonomous state siamsak chu a ṭul tih a sawi bawk. An thil ngiat hian Assam aṭanga inlak hran duhna lam a kawk lo a, Assam chhungah mahnia ro in rel tura thuneihna sang zawk pek phutna mai an ni tih a sawi bawk.