Arunachal sorkarin uluk taka ILP endik turin DC-te a hriattir

Arunachal Pradesh sorkar chuan state chhung luhkaah uluk lehzuala Inner Line Permit (ILP) endik hna thawk turin district tina deputy commissioner-te tan hriattirna a ti chhuak. State chhung him nan leh ram venhimna kawnga ṭan an lak thar theih nan sorkar chuan thuchhuah a siam a ni.

Arunachal sorkar hian state chhung lut turte tana neih ngai, ILP an nei a ni tih uluk taka enfiah turin thuneitute chu a hriattir a, DC-te chu checkpoints hrang hrang hmaih nei loa endik hna kalpui turin a ti a ni. Sorkar hian Arunachal chhunga phalna nei loa lutte dan an nih theih nan ILP hman ṭangkai an tum a ni.

Ramria lut ru an awm loh nan state sorkar chuan ramri venhim leh ngawrh zawka thlithlai a ngai tih hriain patroll uar turin ramri vengtute chu a chah bawk. Hemi bakah hian dan loa luh rukna kawng leh hetiang tura hman ṭangkai theih tur hmunahte chuan venghimtu indah belh turin a hriattir bawk.

Deputy commissioner-te chuan khualzin tana ILP pek chhuah, a bikin electronic ILP (eILP) leh state chhunga hnathawk turten an hman ṭhin ILP chu a danglam a ni tih an hriat chian a ngai tih sorkar chuan a tarlang a, khualzinte tana ILP pekchhuah hmanga state chhunga hnathawk tura luh tumte chu dan an ngai a ni, a ti.

Arunachal chhungah dan loa lut an tam nia mipui lam aṭangin sawi a tam hle a, sorkar chuan uluk taka ILP endik hi kalpui turin thu a pe a, thuchhuah chu zawm nghal tur leh an hmalak dan kimchang hriattir ṭhin turin DC-te chu a chah bawk. Hei bakah hian ILP endik laia thil rinhlelhawm a thleng a nih chuan rang taka thuneitu sang zawk hrilh hre turin a chah bawk a ni.