KSO-in Manipur-ah rorelna hran an ngiat

Kuki Students' Organisation Delhi & NCR (KSOD&NCR) chuan Manipur-a Kuki-Zo te tan rorelna hran an duh tih lantir nan Delhi-ah nawrh an huaihawt. Hemi bakah hian buffer zone aṭanga Assam Rifles lakchhuah tumna chu an duh lo tih an lantir bawk.

KSOD&NCR hian prime minister Narendra Modi hnenah memorandum thehlutin, Kuki-Zo hnamten Meitei kaihhruai Manipur sorkar lak aṭanga tihduhdahna an tuar thu an thlen a ni. Manipur chief minister N Biren Singh chu hleih nei taka rorel ṭhin leh tharum thawhna chawk chhuaktu a ni tih an sawi bawk. Hemi avang hian chi leh chi inkarah buaina chhuakin Kuki-Zo hnam thenfai duhna chu a lo chhuak ta a ni, an ti.

Manipur sorkar chuan humhimna a pe zo lo niin an sawi a, Kuki-Zo hnamte chu enhran an ni tih memorandum-ah chuan an tarlang. State police-te ralthuam dahkhawmna aṭangin ralthuam lakchhuah a ni tih an tarlang bawk. KSO chuan sorkar laipuiin Assam Rifles sawn chhuak tura thutlukna a siam chu pawi an tih thu sawiin, buffer zone a ralmuan theih nana thawktu leh Kuki-Zo hnam venghimtute sawn chhuah an ni mai tur chu an duh lo tih an tarlang.

Tengnoupal-a inbeihnaah mi pali an thi

Tengnoupal district-a khaw pahnih, Molnoi Pallel leh Molnom khuaah kar liamta Zirtawpni khan inkahna chhuakin Kuki-Zo village volunteer pathum leh United Kuki Liberation Front (UKLF) mi leh sa pakhat an thi nia tarlan a ni.

UKLF leh village volunteer-te inkarah hian inhmuhthiam lohna thlengin, hemi hnu hian inkahna a chhuak ta niin an sawi. Inkahna hi zing dar 8 vela chhuak nia tarlan a ni a, Tengnoupal district police-te chuan thil thlen dan enfiah tur hian a hmun an pan nghal a ni.

Manipur chief minister N. Biren Singh pawhin Tengnoupal hmuna inkahna thleng hi budget session neih lai mekah sawi langin Meitei leh Kuki-Zo inkar buaina a ni lo tih a sawi. Inkahna hmunah hian security force tam zawk tirh luh belh niin helai hmuna chengte chu thlamuang taka awm tur leh thudik lo thehdarh lo turin a chah a ni.