Manipur : Chanchinbua hman tur lehkha hal Journalist-ten an dem

Manipur khawpui, Imphal-a tualchhung chanchinbu pakhat hman tur lehkhapuan leh thildang chu kar liam ta Nilaini khan Gamgiphai khua, Kangpokpi district-ah hal a ni a, he thil thleng hi All Manipur Working Journalists Union (AMWJU) chuan an dem thu an sawi.

AMWJU chuan Kangpokpi-a thil thleng hi thuthar thehdarhtute ka hup tumna nia an ngaih thu sawiin, lawngawi lohna lantirin Inrinni khan chanchinbu an tichhuak lo a ni. AMWJU vice president, Raj Nongthombam chuan media-te rahbeh tumna a ni tiin thuneitute chuan he thil thleng hi ngai pawimawh se a duh tih a sawi.

Chanchinbua hman tur lehkha leh thil dang hal hi tute tih nge hriat a la ni loa, heng thil rawn phurtu bus chu Gamiphai-ah tihdin niin lirthei aṭang chuan chanchinbu lehkha chu hlanthlak niin an hal ta a ni. An thil hal chhiat hlut zawng hi Rs nuai 30 hu nia chhut a ni.

AMWJU leh Editors Guild of Manipur (EGM) chuan thuchhuah inṭawm siamin state sorkar, Director General of Police (DGP) leh Security Adviser-te chu lirthei an venhim zawh loh avangin mawhphurhna la ngam tura an duh thu an tarlang. Hemi bakah hian zangnadawmna pe ngei turin an duh tih an sawi bawk.