Arunachal Pradesh : ILP dan bawhchhia mi 155 man

Arunachal Pradesh police chuan an khawpui, Itanagar-ah Inner Line Permit (ILP) regulations bawhchhia mi 155 an man. Police-te hian August 9, Zirtawpni khan ILP endikna an nei tih Itanagar Superintendent of Police, Rohit Rajbir Singh chuan a sawi.

Arunachal sorkar hian tun hnaiah ramchhunga lutte endik hna ngawrh lehzuala kalpui turin district tina deputy commissioner-te chu a hriattir a, ILP nei lo luhtir an nih loh nan ṭan la turin DC-te chu a hriattir a ni. State luhka hrang hrangah ILP uluk lehzuala endik tur leh pek chhuah a nih chhan dik tak ang ngeia hman ni se an duh a ni.

Sorkar hian state chhunga lut turte mai bakah state chhunga awmsa, ILP nei lote endikna hi an kalpui mek a ni. Itanagar SP Singh chuan Zirtawpnia ILP endiknaah hian Ganga khua, Chimpu, leh Ganga bazar hmunahte ILP dan bawhchhia mi 155 an man tih a tarlang.

Arunachal sorkar hian check gate-a khauh taka ILP endik tura a hriattir bakah, state chhung luh ruk theihna laiah venghimtu dah belh leh patroll uar thar turin hriattirna a chhuah bawk. State sorkar chuan ILP hmanga an state chhung venhim leh hemi hmanga ram leilung fate humhim tumin ṭan an la mek a ni.