ULFA-I in I-Day boycott an tum vangin Assam-ah venhimna tikhauh

United Liberation Front of Asom-Independent (ULFA-I) in Assam mipuite Independence Day lawmnaa tel lo tura an ngen a, state pumpuiah Independence day lawmna chu boycott an tum thu an sawi avangin Assam-ah venhimna tihkhauh belh a ni.

ULFA-I hian email hmangin August 15-ah Assam huamchhungah bandh huaihawt an tum thu hi tarlangin, August 15 zanlai dar 12 aṭanga tlai dar 6 thleng awh tur bandh huaihawt an tum tih an sawi. Bandh hian emergency, thuthar thehdarhtute leh sakhaw biakna lama intawhkhawm erawh a huam tel dawn lo a ni.

Assam Director General of Police (DGP) G.P. Singh chuan kar liam ta Inrinni khan Independence day thlen hmain ULFA-I hian beihpui an thlak mai a hlauhthawnawm niin a sawi a, Assam leh Arunachal Pradesh inrina vel bawrah chet lak an tum niin a sawi. Hei vang hian venhimna pawh tihkhauh lehzual a ni, a ti.

ULFA-I helpawl mi leh sa pasarih vel chuan Myanmar aṭangin Assam-ah an lut niin Intelligence lam chuan an tarlang ve bawk. Chet lak an tumna nia an ngaih, Assam-Arunachal ramriah Assam Police leh Assam Rifles chuan helpawl dap hna ngawrh lehzualin an kalpui a, helpawl vanga zalenna ni lawmna a buai loh nan ṭan an la a ni.