Manipur : Helpawl 8 in I-Day boycott dawn

Manipur chhunga helpawl pariat chuan thuchhuah inṭawm siamin Independence Day lawmna an boycott dawn tih an puang. Zalenna ni, August 15 hian state pum huap bandh huaihawt an tum a ni.

Helpawl paruk intel­khawmna, CorCom chuan mipuite chu zalenna an hmuh cham lawm lo turin an hriattir a, August 15 zing dar 1 aṭanga tlai dar 6:30 thleng bandh huaihawt an tum tih an tarlang. Socialist Revolutionary Party (SOREPA) chuan August 15 hian lungawi lohna lantir nan nawrh huaihawt an tum tih an sawi ve bawk.

Alliance for Socialist Unity Kangleipak (ASUK) pawhin August 15 hian state pum huapin bandh an huaihawt dawn tih sawiin, mipuite chu hemi ni hi flag dum kenga 'black day' anga hmang turin an chah.

Helpawl hrang hrang hian Manipur buaina a ziaawm theih loh chhan chu India sorkarin a ngaihthah vang niah an ngai. Manipur chuan tihduhdahna a tuar mek avangin Independence Day chu an tan ni lungchhiatthlak mai a ni tih an tarlang. Security force-te chuan zalenna ni lawmnaa buaina a chhuah loh nan ṭan an la ve nghal bawk a ni.

Manipur helpawlten I-Day an boycott dawn tih an puan hma hian hmarchhak-a helpawl lian pahnih, National Socialist Council of Nagaland (Yung Aung) leh United Liberation Front of Asom-Independent te chuan India zalenna ni lawmna neih tur hi Assam, Manipur, Nagaland leh Arunachal Pradesh-ah an boycott dawn tih an lo puang tawh bawk a ni.