Sorkar zirna-inte luhna tlakin kan siamṭha ang : Arunachal CM

Arunachal Pradesh chief minister Pema Khandu chuan state chhunga sorkar enkawl zirna-inte chu siam ṭhat an tum tih sawiin, zirlai naupang nu leh paten an fate an dah ngamna turin an siam dawn tih a sawi.

Chief Minister Khandu hian ‘Chintan Shivir cum Education Conclave-2024’ a hmanpuinaah thu sawiin state chhunga zirna-in, a bikin sorkar sikul chu siam ṭhat a ngai hle tih a sawi. Nakkum lama hman ṭan tur, zirna-in ṭha zawk neih dan turah ruahmanna siam mek a ni tih a tarlang bawk.

Deputy Commi­ssioners leh School Education Deputy Director te chu sokar zirna-in siam ṭhat dan tura ruahmanna siam hna thawk tura ruat an ni a, September 15 hmain an ruahmanna siamte thehlut tura hriattir an ni. Arunachal CM hian sorkar hotute chu sorkar sikul siam ṭhat dan tura ruahmanna an siam chu chak taka kalpui turin a chah a ni.

"Nu leh paten an fate luhtir an chakna tur khawpin sorkar sikul hi thlak danglam kan tum a ni," Khandu chuan a ti. Arunachal state chhunga zirna kalphung chu National Education Policy (NEP) zulzuia kalpui an tum tih sawiin, kum 2030 hmaa NEP zulzuia an kal theih nan theihtawp chhuah turin thawktute chu a chah bawk.

CM chuan zirtirtute hlawh inang reng chunga zirna kawnga private sikul leh sorkar sikul a inthlau lutuk chu pawi a tih thu leh, hei hi thlak danglam an tum dawn tih a sawi. Sorkar zirna-inte chu eng dinhmuna dingte pawhin luh an chakna tur khawpa ṭhaah siam an tum thu a sawi.

Sorkar zirna-in siam ṭhat a nih theih nan hian ṭanrual a ngai tih Chief Minister chuan a sawi bawk a, mipui aiawha thlante, Panchayat hotute leh education official te chu zirna-in siam ṭha turin an ṭanrual a ngai a ni, a ti.