Meghalaya : Kawngpui siamna atan Rs vbc 2500 pe

Union Ministry of Finance chuan Meghalaya tan kawngpui thar siamna turin Rs vbc 2500 a pe chhuak.

Meghalaya chief minister Conrad Sangma leh deputy chief minister Prestone Tynsong te chuan nimin khan union finance minister Nirmala Sitharaman an hmu a ni. CM Sangma chuan an meeting chu an hlawkpui hle tih a sawi a, "EAP hnuaiah kawng siamna turin Rs vbc 2500 min pek vangin union minister Nirmala Sitharaman hnenah lawmthu ka sawi a ni" a ti. Meghalaya khawpui, Shillong leh hmun dangah hmasawnna chak zawka an neih theih nan 'growth hubs' dinna kawnga hmalakpui turin FM chu a ngen bawk.

Meghalaya Integrated Transport Project (MITP), 2nd phase atana hman turin tun hnai khan Rs vbc 2000 pawm a ni a, heng pawisa hmang hian inkalpawhna ṭha zawk siam a nih bakah logistics infrastructure changtlung zawk dinna atan hman a ni ang. MITP hnuaia hnathawh hi phase hrang hranga kalpui niin World Bank aṭanga Rs vbc 880 an hmuh hmangin phase khatna chu kalpui a ni.