Sikkim hmeichhia Delhi-ah pawngsual

Sikkim hmeichhia kum 25 mi chu South Del­hi, Hauz Khas hmunah kar kalta Ningani, Feb­ruary 26 zan khan pawng­sual a ni a, All India Institute of Medical Science (AIIMS)-a doc­tor pakhat leh midang pali chu pawikhawihtua rin­hlelh niin, man nghal an ni.

Vanduaina tawktu hi February 20 khan beauty parlour-a hna pek tiamin, Delhi-a hruai thlak a ni a, Delhi a thlen hnuah room pakhatah hrengin, nawhchizawrhnaa hruai luh tum a ni.

Rinhlelh zing a mi AIIMS doctor, Mehr Tez (27) hi Hyderabad mi a ni a, thla hnih hnua nupui nei tur a ni, tiin police te chuan an sawi. Police te'n rinhlelh dang an man te chu- Suman (37) leh a pasal Sagar (40) bakah Dharamveer (32) leh Kamal (31) te an ni.

Gautam Nagar-a auto rickshaw driver pakhat chuan February 27 zing khan a passenger hmei­chhe pakhatin ṭap chung­in pawngsual a tawh thu min hrilh tia police te hnena a thlen hnuah thilthleng hi hai lan a ni.

Police team te chuan hmeichhia hi police station-ah hruaiin, Suman hian February 20 khan Delhi-a hna pek tiama Delhi-a a hruai thlak thu police te a hrilh.

AIIMS doctor Mehr Tez chuan nawhchizawrh sumdawnnaa inhnam­hnawih Suman chu hmeichhe awmpui tur pe tura a biak thu police te hmaah a sawi a, Suman-a thawhpuite'n Sikkim hmeichhia hi a chenna ina an lo thlah thu leh anmahni chu cheng 9,000 a pek thu a sawi.

Vanduaina tawk Sikkim hmeichhia hi pasal nei tawh niin, a pasal chu sipai, Gorkha Regiment a ni a, Rajasthan-a post a ni.

Hmeichhiain a chunga thilthleng police te a hriattirna leh Mehr Tez-a inpuanna aṭangin police te chuan pawngsual leh mihring­a sumdawnna thubuai hmangin pawikhawihtute hi thubuai an siamsak nghal.