Assam-in a ramri bial hmasawn nan ṭan la dawn

Assam cabinet chuan inter-state border area hmasawnna atana rawtna lut chu a pawm a, hei bakah hian tuilian vanga chhiatna thleng tuarte chhawmdawl rawtna a pawm bawk.

Assam Agriculture Minister Rakibul Hussain chuan he thu hi sawiin, development lam buaipuitu department hrang hrangte chu fund an dawn aṭanga 5% ṭheuh chu ramri bial hmasawn nan dah tura hriattir an ni, a ti.

Assam cabinet chuan tuilian avanga chhiat tuar, chhenna in chhia, leilet chhia leh thlai chin chhiate chhawmdawlna pek a remti bawk.

Khuarel chhiatna thleng ṭhin laka chhawmdawl leh chhanchhuah hna chak zawka thawh a nih theih nan State Disaster Response Force additional company siam a remti bawk.

Assam cabinet meeting chuan medical college leh Regional Dental College-a lut thei tur thlan danah ruahmanna thar a siam bawk a, ruahmanna thar ang chuan Assam zirlai an naupan aṭanga pawl 12 thleng state pawna lehkha zirte chuan medical leh dental college-a Assam quota aṭangin seat an beisei thei lo ang.