Sorkar laipuiin ramri hung tura hmalakna chak zawka kalpui turin state 2 a hriattir

India leh Myanmar ramri hung tumna kawngah hma lak chhunzawm zel niin, sorkar laipui chuan Arunachal Pradesh leh Manipur sorkar chu ramri hung tura an inbuatsaihna chak zawka kalpui turin a hriattir.

Sorkar laipui hnuaia home ministry chuan state pahnih chief secretary bakah Assam Rifles director general chu lehkha thawnin, chak zawka hma la turin a ti. Sorkar laipui hian Detailed Project Report thehlut thuai turin Arunachal leh Manipur sorkar chu a hriattir a ni.

Indo-Myanmar ramri hi kilometer 1,643-a thui niin Arunachal (520 km), Nagaland (215), Manipur (398) leh Mizoram (510) ahte a kaltlang. Sorkar laipui hian dan loa India ram lut an tlem theih nan ramri hung tur hian thutlukna a lo siam tawh a ni. Hemi bakah hian Free Movement Regime a lo titawp tawh bawk.

Arunachal leh Manipur-ah hian ramri hung hna hi thawh ṭan ni tawh mah se a tam zawk hung a la ni lo thung. Arunachal-ah hian 480 km chu la hung loh niin Manipur-ah hian 243 km chu hung a la ni lo bawk. Ramri hung hmabakahte hnathawh ṭan a nih theih nan sorkar laipui chuan chak zawka hma lak a duh a ni.

Union home ministry chuan Arunachal sorkar leh Manipur sorkar chu Assam Rifles leh Border Road Organisation (BRO) te nen ramri hung chungchang sawi ho tura ṭhukhawm turin a hriattir a, ramri hungna lai tur tifel thuai turin a ti. Assam Rifles pawh state pahnih sorkar thawhpui tura hriattir an ni bawk.

Hmarchhak state zinga Myanmar ramri nei zingah Nagaland leh Mizoram chuan ramri hung hi an duh lo hle a, Nagaland assembly chuan sokar laipuiin ramri hung a tumna leh FMR a tihtawp chungchang ngaihtuah ṭha leh tura an duhna resolution a pawm a, Mizoram assembly-ah pawh hemi duh lohna resolution hi put luh niin lungrual taka pawm a ni bawk.