Tripura MLA-in Bangladesh sorkar hnenah minorities humhim turin a ngen

Tripura tualṭo party, TIPRA Motha MLA Ranjit Debbarma chuan Bangladesh sorkar chu an ram chhung, Chittagong Hill Tracts-a Hindu, Buddhist leh Kristiante humhin tura ngenna lehkha a thawn.

Ranjit Debbarma chuan sakhaw tlem zawk vuantute chuan tihduhdah an tuar tih sawiin, mipui lungawi loten an kut an thlak bakah an chenna hmunte an halsak ṭhin niin a sawi. Heng avang hian sakhaw tenau zawk zuitute dinhmun chu a ṭha lo hle a ni, a ti.

Tripura MLA hian Chittagong Hill Tracts aṭangin tihduhdahna tuar vang leh chhan dang vangin hmarchhak hmun hrang hrang - Tripura, Meghalaya, Assam leh Mizoram bakah West Bengal-ah an lut tih a sawi. Bangladesh sorkar lailawk ding thar chuan heng mite himna hi ngai pawimawh se a duh tih a tarlang.

Debbarama chuan Chittagong Hill Tracts bakah Habiganj leh Maulavibazar district-ah tualṭo hnamte leh sakhaw tenau vuantute tihduhdahna a thleng tih a sawi bawk. Helai hmunah hian Bangladesh sorkar chuan venhimna tikhauh se a duh tih sawiin, buaina a zual loh nan minorities humhim chu ngaih pawimawh a ngai a ni, a ti.