Sikkim CM-in Indrani lei dawh thar a hawng

Sikkim-a khuarel chhiatna vanga harsatna an tawh hnua infrastructure din thar lehna tura sorkar hmalakna pawimawh tak pakhat, Singtham-a Teesta lui-a lei dawh thar, Indrani lei chu chief minister Prem Singh Tamang (Golay) chuan Thawhṭanni khan a hawng.

Lei hi ft 300 a sei niin Bailey Suspension Bridge (BSB) a ni a, Border Road Organisation (BRO) in Project Swastik hnuaia an siam a ni. October 4, 2023-a Sikkim-a khuarel chhiatna nasa tak a thlen ṭum khan, he luia lei dawh chu sabereka-khuangkaihin a la a ni.

CM Golay chuan state chhunga chhiatna thlengin thil a tihchhiat hrang hrang thlengte thawm ṭhat leh hna thawh chu sorkarin a dah pawimawh hle tih sawiin, an state-a economy leh infrastructure hmasawnna hna thawhna kawngah BRO chuan hmun pawimawh tak an luah thu a sawi.

Indrani lei chhe ta kha Sikkim Public Works Department(PWD) te dawh niin, Sikkim state chhim leh hmar inkalpawhna pawimawh tak a ni. Hei vang hian sorkar chuan lei dawh ṭhat leh hna chu rang taka thawh a ṭul zia a hria a, ruahmanna pawh rang taka siamin, lei thar dawh hna pawh chak taka thawh zui a ni.

BRO- hian phalna leh tih fel ngaite tih fel a nih hnuah May thla laihawl aṭangin hna an thawk ṭan a, lei dawh tur ruangam leh kalkhang pawimawh te hi hi July 30 khan dawh zo nghal in, ni sawm chhungin a dang pawimawh pawh an thawk zo leh nghal a ni. Lei dawh hna rang taka zawhfel a ni hi Sikkim dinthar leh hna thawh kawnga mellung pawimawh tak a ni a, Sikkim chhim leh khawthlang lam pawh inkalpawh leh thei nghalin, Namchi huam chhung a ei leh bar leh state hmasawnna tur kawng pawh a hawnsak nghal bawk.