ILP bill pass phutin Manipur-ah nawrh huaihawt

Manipur-a inner line permit (ILP) system kalpui phuttu, Joint Committee on Inner Line Permit System (JCILPS) chuan Pathianni khan Manipur Assembly session neih mekah ILP system bill pass phutin sit-in protest an huaihawt.

'United Committee Manipur on Influx of Migrants into Manipur’ chuan report a buatsaihah Manipur-a pemlut hi state leilung fa (indigenous tribal) te aiin an tam zawk. Kum 2001 chhiarpui chuan Manipur-ah hian pemlut mi 7,04,488 a chhinchhiah a, indigenous tribal 6,70,782 leh Manipur-a hnam peng lian ber, Meitei 9,18,626 a chhinchhiah bawk.

Kar kalta Inrinni khan JCILPS chuan Manipur Assembly session nimina neihah state sorkar ILP bill hi a pass loh vangin vawiina session kharna neih tur chu boycott a rel bawk.

JCILPS convenor Ibotombi Khuman chuan state sorkar chu rinawm lo leh thu tiama ding loah puhin ILP bill chu pass a nih loh chuan Chief Minister leh Cabinet Minister chu boycott an tum thu leh mipuite duh dan anga an nihna aṭanga bang tura a phut thu a sawi bawk.

February 18-a Chief Minister, cabinet minister, dan hre mite leh All Political Parties Committee on ILP' member te'n ILP system chungchanga meeting an lo neih tawh bawhzui nan state sorkar chuan assembly session neih mekah ILP bill chu a putluh ngei mipuite'n an ring a ni, tiin Khuman chuan a sawi bawk.

JCILPS co-convenor K Ratan pawhin ILP bill pass a nih loh chuan sorkar pawmpuina nei lo pemlutte thawnkir chu ngawrh zawka kalpui an tum thu a sawi bawk a, ID card nei lote chu an state-a thawnkir an ni ang, a ti.