Sorkar laipuiin detailed report thehlut turin state hriattir

Assam-a reserve forest-a mi cheng an awm nia sawi chungchangah sorkar laipui chuan report kimchang thehlut turin state sorkar a hriattir.

Ministry of Home Affairs (MHA) official chuan Assam-a reserve forest-a mi cheng awmte chu hel pawlte'n remchang an hman ṭhin a avangin sorkar laipuiin a ngai thutak hle tiin a sawi a, Assam sorkar hnen aṭanga report a dawn hnuah hmalak zel dan tur chu ngaihtuah a nih tur thu a sawi.

MHA official chuan mi ṭhenkhatin reserve forest an luah chun­g­changah hian MHA leh Ministry of Environment and Forests chuan in­biakna an neih thu sawiin, a ṭul a nih chuan Environment and Forest Ministry pawh a inrawlh tur thu a sawi.

Mi ṭhenkhatin Assam tribal te chenna hmun an luahsak chungchang pawh hnam hrang hrangte inkara buaina thlen thei a nih avangin sorkar laipuiin a ngai thutak hle tiin official chuan a sawi bawk.

Ram inluahsak avang­a inhriatthiam lohna thleng kaihhnawihah nikum December 23 khan Songbijit-a kaihhruai National Democratic Front of Bodoland (NDFB-S) chuan Chirang, Sonitpur leh Kokrajhar district-ah buaina an thlen a, hemi vang hian Adivasi hnam leh Bodo hnam mi 70 chuangin nunna an chan phah a ni.