Education-ah Manipur intodelh thuai dawn: Education minister

Manipur Education Minister Moirangthem Okendro chuan Manipur chu zirnaah a intodelh thuai a beisei thu a sawi.

Mayang Imphal Kenchak Heigumyangbi-in Imphal West-a programme a buatsaihah Okendro chuan he thu hi sawiin, SSA, RUSA leh RMSA hnuaiah state sorkarin elementary school 323 chu secondary school-ah a hlangkai tawh tih a sawi bawk.

Zirlai mipa naupang pakhat chu pawisa rua puh a nih avanga school thuneitute'n kut an thlak nia sawi chungchangah state education minister chuan thil thleng chu a dem thu sawiin, zirlaite dikna chanvo palzutna a ni, a ti a, rawng taka zirlai naupang kut thlaktute chu hrem an nih tur thu a sawi.

February 26 khan Imphal West, Langjing Achouba Tabungkhok-a Ima Medhabati Public School-ah zirlai naupang pakhat chu pawisa rua puh anih avangin school thuneitute nasa taka kut an thlak hnuah, buara ipah an khung niin an sawi a, mipa naupang hian a tukah school hi a chhuahsan nghal a ni.

He thil thleng vang hian Democratic Students’ Alliance of Manipur (DESAM) chuan Ima Medhabati Public School chu khar an phut bakah Manipur State Commission for Child Rights chu a na thei ang bera school thuneitute chunga action la turin an phut bawk.

March thlaa CBSE hnuaia pawl 10 leh 12 exam neih tur chungchangah Education Minister Okendro chuan zirlai 2000 chuang chu an exam theih loh tur thu a sawi.

CBSE chuan Manipur-a private school ṭhenkhat chu a recognise an nih loh avangin board exam tur zirlaite chu admit card a pe­chhuak thei lo a, hemi chung­changah hian Imphal West district-a mipui thinrim chuan February 21 khan private school pahnih an hal a ni.

Manipur Education Minister chuan thil dik lo titute school te lakah FIR thehluh tur a nih thu leh zirlai exam thei lote tan rorelna dik hlenchhuah a nih ngei theih nan school thuneitute chu hrem an nih tur thu a sawi.

Zirna kaihhnawiaha thil thleng dangah DESAM chuan college lecturer hna lak exam-na February 26-a neihah Manipur Public Service Commission (MPSC)-in question a siama, chhanna dik lo duhthlan tur a siam chungchangah MPSC chu a dem thu a tarlang. DESAM chuan MPSC chu Wyoming University-in Physical Geology question paper a buatsaih saa zawhna 20 chuang a nihna ang taka copy-ah a puh.