CNG hian carbon pek chhuah a tlem nan a pui ang : Assam CM

Assam-ah Compressed Natural Gas (CNG) station panga hawn thar niin a hawngtu, chief minister Himanta Biswa Sarma chuan carbon pek chhuah a tlem theih nan CNG hman hian a pui thei dawn tih a sawi.

CNG station thar panga hi Ulubari, Sonapur, Lalmati, Kahilipara leh Azara-ahte hawn niin, Purba Bharati Gas Private Limited in a din an ni. CM Himanta chuan boruak tibawlhhlawh lo tura ṭan an lak zel tur thu sawiin, Assam chuan CNG station 38 a nei thuai dawn a ni, a ti.

CNG hi fossil fuel chi khat ni mah se tuialhthei dang aiin carbon dioxide 5-10% velin a pe chhuak tlem zawk. CNG hmang lirthei hian khu a chhuah tam loh avangin boruak bawlhhlawh a siam tlem a, petrol leh diesel hmang lirthei aiin a thlanawm zawka ngaih a ni.

CM chuan Kamrup Metro leh Kamrup district chhunga CNG station pasarih a awm tawh tih sawiin station dang pariat siam hna zawh a nih dawn hnai a, hemi bakah hian station dang 15 siam hna chu thawh mek a ni, a ti. Barak valley-ah CNG station pathum a awm tawh thu leh siam mek pahnih a awm tih a sawi bawk.

Assam CM hian station thar panga hawnna hun hi internet kaltlangin a nei a, 'Greener Guwahati' a awm theih nana hmalakna pawimawh tak pakhat a ni tih a sawi. Assam sorkar chuan tuialhthei, boruak bawlhhlawh pe chhuak tam chu renewable energy hmangin a tahtawlin thlak chhoh zel an tum tih a sawi bawk.

Assam chhunga renewable energy chakna hman tam a nih theih nan sorkar chuan solar power project, mega watt 3000 pe chhuak thei siam zawh a ni dawn tih CM chuan a tarlang bawk. Assam khawpui bawlhhlawh a ziaawm nan CNG hmang bus leh electric bus chu Guwahati-ah hman a ni tawh a ni.