Nagaland : NSCN/GPRN in Naga Independence Day an lawm

India ram an nihna pawm duh lo leh Nagalim din tumtu, National Socialist Council of Nagaland (NSCN) chuan nimin, August 14 khan Naga Independence Day an lawm. He zalenna ni an lawmna hi India aṭanga zalenna an duh tih lantirtu a ni tih an tarlang.

NSCN kaihhruai sorkar, Government of the People's Republic of Nagalim (GPRN) hnuaia information & publicity ministry chuan thuchhuah siamin India zalenna ni - August 15 chu Naga mipuite chuan an pawm theih loh thu leh, India bakah Myanmar danpui chu hnawlin mahnia ro in rel an thlang zawk tih an sawi.

GPNR thuchhuah chuan Amsterdam Joint Communique July 11, 2002 leh Framework Agreement August 3, 2015 a inremna ziahte chu Nagalim zalenna pawmpuitu a niah ngaiin, India sorkarin heng inremna a kengkawh ṭha lo chu an dem tih an sawi a, Nagalim din tura an duhnate tihpuitlin a ni lo chu pawi an tih thu an tarlang.

NSCN/GPRN chuan zalenna chu tun dinhmunah la hmu lo mah se mahnia ro in rel tura Nagalim din a nih theih nan India leh Myanmar sorkar nen inremna nei thei turin kawng an zawng chhunzawm zel dawn tih a sawi.

Naga Students Federation (NSF) chuan an hnuaia unit hrang hrang leh anmahni zawmtute chu August 14 khan 'Naga Independence Day' pualin Naga national flag zar turin hriattirna a lo chhuah tawh bawk. "Naga national flag zar pharh hian kan inpumkhatna, kan nihna leh Naga hnam duhna tipuitling tura kan ṭanrualnate a pho lang a ni" tiin NSF chuan an sawi.