Tripura : Panchayat inthlana hnehna changtu BJP hotuten lawmthu sawi

Tripura-a panchayat chhawng thum - Gram Panchayat, Panchayat Samiti leh Zilla Parishad inthlanah state chhunga sorkar lai, Bharatiya Janata Party chuan seat tam zawkah hnehna an chang. Tripura mipuite thlawpna an hmuh avangin BJP hruaitute chuan lawmthu an sawi.

BJP hian Gram Panchayat-a seat awm 6,370 aṭangin seat 5,883-ah hnehna an chang a, Congress (138), BJP thawhpui Tipra Motha chuan seat (102) lain independent candidate 20-ten hnehna an chang ve bawk.

Panchayat Samiti-a seat awm 423-ah BJP chuan seat 403-ah hnehna an chang a, Congress (8), CPI-M (7) leh Independent candidate (1) ten a bak an la ve bawk. Zilla Parishad-a seat 116-ah BJP (113), Congress (2) leh CPI-M (1) ten seat awm an insem bawk a ni.

Panchayat chhawng thum zinga seat awm tam zawkah hnehna an chan avangin BJP hotu lian - union home minister Amit Shah, Tripura chief minister Manik Saha leh BJP national president JP Nadda te chuan lawmthu an sawi. "Tipura mipuiten hnehna hriatreng tlak min pek avangin an chungah lawmthu ka sawi a ni" Shah chuan a ti.

Tripura CM Saha pawhin mipuite hnenah lawmthu sawiin an chunga rinna an nghat chu lawmawm a ti hle. Saha hian prime minister Narendra Modi leh BJP president JP Nadda te chu hmathlir thui tak nei chunga an kaihhruai avang leh an thlawp tlat avangin an lawmthu a hrilh bawk.