Manipur : Sorkar-in ILP aṭangin Rs vbc 11.74 hmu

Manipur sorkar chuan kum 2020 a Inner Line Permit (ILP) hman ṭan a nih aṭanga August 12, 2024 thlengin ILP certificate pek chhuahna aṭanga pawisa an hmuh chu Rs vbc 11.74 a tling tawh.

Chief minister N Biren Singh chuan ILP pek chhuah aṭanga pawisa an hmuh chhuah zat hi Manipur assembly-a appropriation bill an sawi honaah a sawilang a ni. Heng pawisa hi sorkar sum bawmah chhun luh ṭhin a ni tih a sawi bawk.

Manipur-ah hian January 1, 2020 aṭangin ILP hi hman ṭan niin, ILP dan hmanna state palina a ni. Manipur-a hman a nih hma hian Arunachal Pradesh, Nagaland leh Mizoram-ahte hman a lo ni tawh. Manipur CM chuan ILP hman a nih aṭang hian mi nuai 8.53 hnenah ILP pek chhuah a ni tawh tih a tarlang bawk.

ILP hi state sorkar pek chhuah niin state chhung luh tum - hnathawk leh khualzin anga lut turte chuan ILP hi an neih a ngai. Hmarchhak state pali hian hnam dang laka inhumhim nan hmangin, pawn lam mi laka invenna ṭha tak a nih avangin Meghalaya chuan an state tan ILP hman a nih ve theihna turin sorkar laipui an nawr ve mek a ni.