Assam : NGT-in ramngaw humhalha in sak avangin sorkar thu zawtfiah

National Green Tribunal (NGT) chuan Assam leh Nagaland ramri a awm, Geleky Reserve Forest-a Assam commando battalion building sak chungchangah sorkar thu a zawt fiah. Ramngaw humhalh laia in sak hna thawh a ni hi Forest (Conservation) Act, 1980 bawhchhiatna a nih tih NGT chuan an sawi.

Geleky ramngaw humhalhah hian Ministry of Environment, Forest & Climate Change (MoEFCC) hriatpuina tel loin hectares 28-a zau ramah in sak a ni tiin RTI activist Rohit Choudhury chuan NGT-ah complaint a thehlut a, Justice Sheo Kumar Singh leh Dr Arun Kumar Verma te awmna bench chuan thubuai hi an ngaihtuah a ni. Sorkar laipuia MoEFCC aṭanga chhanna an la nghak mek.

Forest (Conservation) Act chuan ramngaw humhalh chhunga chenna in sak a khap tih NGT chuan tarlangin, kum 2019-a inkaihhruaina an siamah chuan ramngaw humhalh chhunga in sak a nih dawn pawhin a ṭul bik a nih chuan ramngaw tichhe lo zawnga in sak hna chu kalpui tur a nih thu an tarlang bawk. Heti chunga Assam sorkarin police awmna tur a sa hi NGT chuan mak a ti hle tih a sawi.

NGT chuan ramngaw humhalhna dan bawhchhiaa commando 800 awm theihna tur building lian tak sak a nih chungchangah sorkar laipui thu an zawtfiah a, hetiang building lian sak phalna chu sorkar laipui chauhin a pe chhuak thei a ni. Assam Principal Chief Conservator of Forests (PCCF) M K Yadava chunga MoEFCC-in hma an lak dan NGT hian a ngaichang mek bawk.

MoEFCC chuan mi pathum awmna committee chu ramngaw humhalha building sak zir chiang tur hian din a ni tih an sawi a, report erawh an la thehlut lo thung. NGT hian report thehluh nan thla khat chhung hun an pek belh a ni.

Assam sorkar chuan Geleki Reserve Forest a chereu zel tur leh helai hmun hi dan phal loh thil tih nan hman ṭhin a nih avangin commando building sak hi a ngai niin an sawi thung.