Japan leh Meghalaya thawk dunin Cherry Blossom Festival huaihawt dawn

Meghalaya sorkar chuan favang hunlaia khualzin hipna tura ruahmanna an siam, autumn tourism calendar chu tichhuakin festival lar leh ngaihven hlawh, Shillong Cherry Blossom Festival chu Japan nena thawkdunin huaihawt a ni dawn tih tarlan a ni.

Japan ambassador-in kum 2023-a Meghalaya a tlawh ṭumin Meghalaya leh Japan rama tlaizawng parte chu inang a tih thu leh, hemi pual festival neih leh hunah thawk dun turin rawtna a lo siam tawh a ni. He festival, November 15-16 a neih turah hian Japan Zone siam tel a ni tawh anga, an hnam ziarangte tarlan a ni ang.

Meghalaya tourism minister Paul Lyngdoh chuan ramdang nena he festival an huaihawt thei tur chu lawmawm a tiin a chhimtu an pun ngei a beisei a, he festival hian a hlawkpui ngei a beisei bawk a ni.

Sorkarin calendar a tih chhuaha intihhlimna tur dang a ruahmante chu - Shillong Literary Festival (November 12-14), Me'gong Festival (November 29-30), The Hills Festival (December 6-7), Bryan Adams India Tour (December 10) leh Winter Tales (December 12-14) te an ni.

Meghalaya sorkar chuan khualzinte himna kawnga ṭanpui turin state chhung mite chu 'Tourist Assistant' atana hman theih turin ruahmanna a siam bawk. Heng mite hian khualzinte thil chinchang an hrilhriat bakah an himna atan an pui dawn a ni. Chief minister Conrad K Sangma chuan state chhunga ṭhalaite hna siamsak nana thil ṭha tak a ni, tiin a sawi.