Arunachal : Itanagar-ah ropeway leh e-bus hman tum

Arunachal Pradesh khawpui, Itanagar-ah inkalpawhna ṭha leh awlsam a awm theih nan sorkar chuan ropeway leh electrict bus hman a ni dawn tih an puang. Hei hi khawpui chhung inkalpawhna ruhrel ṭha zawk siam tumna a ni bawk.

Itanagar Municipal Corporation (IMC) mayor, Tamme Phassang chuan ropeway siam tura inbiakna chu a hmawr an bawk hnai tawh tih a sawi. Hyderabad leh Gujarat-a company-te nen ropeway siam tur hian inbiakna an nei tih a sawi bawk. Ropeway hi khawpui chhung hmun pawimawh laiah hman theih tura ruahman niin Lobi Division 4, Secretariat, Ganga Market, Chimpu te tlawhin heng hmuna let leh tura ruahman a ni.

IMC hian Arunachal Pradesh State Transport Services (APSTS) nena thawkdunin Itanagar chhungah e-bus 10 tlan tir an tum bawk a ni. IMC mayor Phassang chuan an enchhinna a hlawhtlin dan a zirin hmalam huna e-bus tam zawk tlan turin ruahmanna an siam tih a sawi bawk. Heng hmalaknate hian khawpui chhung inkalpawhna changkang leh boruak tibawlhhlawh lo zawnga IMC hmalaknate a tarlang a ni, mayor chuan a ti.