Assam-in kum 10 chhungin vbch 86,000 a hmang hman lo

Assam sorkar department hrang hrangte chuan kum 10 chhungin an tana sum ruahman cheng vaibelchhe 86,000 an hmang hman lo.

Assam-a Principal Accoun­tant General Shantanu Basu chuan kum tinin plan fund-a sum ruahman eng maw zat chu hman loha a awm ṭhin thu a sawi a, financial year tawp ni March 31 hnuah chuan heng fund te hi dan anga a awm tawh loh thu leh a awmna chin a hriat loh thu a sawi.

Assam Tribune-in Assam sum inrelbawl dan report a buat­saihah kum 10 chhung, kum 2002-03 aṭanga 2011-12 thleng khan plan fund vai­belchhe 86,000 chu hman lohin a awm a ni.

Budget aṭanga sum hmanna tur ruahman te hi a taka hman a nih ṭhin loh avangin scheme hrang hrang kalpui mek te'n an tuar ṭhin a ni, a ti a, Assam chuan special category state a nihna anga sorkar laipui aṭanga grant a dawn tam tak chu a hmang ṭhin lo a ni, a ti.

Kum 2011-12 chhungin Assam chuan fund ruahman aṭanga 25% chuang hman loh a neih thu a tarlang bawk.

Report chuan department hrang hrangte'n welfare scheme hrang hrang an kalpui mekah fund ruahman sa an hman lohte a tarlang bawk a, Assam-ah tuilian thleng reng mah se Water Resources Department chuan kum 10 chhungin an tana sum ruahman an hmang zo lo a ni, a ti. Water Resources Department-in department-in fund a hman zawh hman lohte hi sum ruahman aṭangin 38-60% inkar a ni. Department dangin sum an hman lohna te chu- social security, welfare & nutrition, urban development, roads and bridges, power, healthcare leh a dangte a ni a, hei hian hmasawnna nasa takin a tiṭhuanawp a ni, a ti.

Assam Tribune report chuan sorkar hnathawk hlawh atana sum tak tak sen a nih avangin vantlanga tana hna ṭha thawhna tur sum a tlem phah tiin a tarlang bawk. Thil man sang avanga leh hnathawkte thla hlawh pung avangin state sum bawm aṭanga senso chu kum khatah 18% vela a pun thu a tarlang bawk a, hetihlai hian capital expenditure erawh 2-3% chauhin a pung thung.

Report chuan kum 2011-12 chhungin Assam Gross State Domestic Product (GSDP) chu 12.7%-a pun thu a tarlang a, hei hi special category state-a awm te zingah a hniam ber a ni, a ti. Kum 2011-12 chhungin Uttarakhand GSDP chu 24%-in a pung a, Sikkim GSDP chu 19%-in a pung bawk.