CBSE exam buaina chhui turin sorkarin panel a din

Manipur Education Minister Moirangthem Okendro chuan Central Board of Secondary Education (CBSE) hnuaia zirlai 2500 chuang­in pawl 10 leh 12 an exam theih loh chungchang chhui turin fact finding committee din a ni, a ti.

State education minister chuan commi­ttee-ah hian member panga ruat an nih tur thu a sawi a, School Education Director chu a hruaitu atan ruat a ni, a ti. Committee hi thla khat chhunga report thehlut tura beisei a ni.

Manipur-a pawl 10 leh 12 zirlai te'n CBSE hnuaia board exam an hmachhawn theih loh chungchangah state sorkar chuan CBSE thuneitute hnenah lehkha thawnin exam thei lo zirlaite luhna school neitute chungah action la turin a ngen tawh bawk.

Pawl 10 leh 12 zirlai exam thei lote luhna school te hi CBSE-a an in affiliate loh avangin CBSE chuan zirlaite hi board exam-na atan admit card a pechhuak thei lo a ni.

CBSE-a in affiliate lote hi school panga an ni a, chung te chu- Central Institute of Science Hodam Leirak, Galaxy Senior Secondary school, ASEAN Co-educational Institution, Akash Institute of Science and Arts leh Ramkrishna Higher Secondary School te an ni a, CBSE affiliate school pahnih- MM Higher Secondary School leh Little Rose Higher Secondary School te kaltlangin an zirlaite board exam turin form an fill up sak nia sawi a ni.

School naupangte board exam theih loh chungchang hi Thawhṭanni khan state Assembly session -ah Trinamool Congress MLA Th Shyam­kumar leh NCP MLA L Ibomcha te'n an sawichhuak a, zirlaite chu kalphung dik loh tuartu an ni tur a ni lo, an ti.

Pathianni khan zirlai naupang exam thei lo chhungte chuan state sorkar chu zirlaite tan special exam buatsaihsak turin an ngen.

CBSE hnuaia pawl 10 leh 12 exam hi Thawhṭanni khan Manipur-a centre 25-ah ṭan a ni.