SFC-in NE tana 24x7 TV channel siam rawtna a pawm

Sorkar laipui hnuaia Standing Finance Committee (SFC) chuan hmarchhak biala tana 24x7 television channel siam rawtna a pawm.

Union Finance Minister Arun Jaitley chuan nikum July thlaa Union Budget 2014-15 a pharh ṭumin hmarchhak mite tana television channel siam a nih tur thu hi a puang tawh a ni.

‘Implementation of Budget Announcement 2014-2015 tabled in the Parliament’ report chuan he thu hi a tarlang a, Jaitley chuan TV channel siam rawtna chu Information and Broadcasting Ministry leh Prasar Bharati pawh hriattir a nih tawh thu a sawi bawk.

Hmarchhak mite tana darkar 24 chhung television channel hi 'Arun Prabha' tia a hming vuah a ni a, hmarchhak mite nungphung leh hnam thilte tarlanna atana ruahman a ni.

Kum 2014-2015 Budget Announcement report chuan hmarchhak bialah railway project 19 kalpui mek a ni tih a tarlang bawk a, heng zinga project pakua chu national project a ni a, project pahnih chu peihfel tawh a ni. Project pahnih peihfel tawhte hi- Harmuti-Naharlagun project leh Meghalaya tlawhpawhtu, Dudhnoi-Mendipara project te an ni.

Rangiya-Murkongselek inkara rel kawng kilometre 510-a thui zauh hna pawh thawh zawh tawh a ni a, kumin chhunga hawn hman beisei a ni.

Union Finance Minister Jaitley chuan nikum budget speech-a sawi ṭum khan hmarchhak bial chu a kalpawhna a ṭhat loh avangin hmasawnnain a kal hlen nasa hle a ti a, hei vang hian mipuite pawhin inlak hranna rilru an pu a, rela inkalpawhna changtlung siam a ṭul hle a ni, a ti.

Union Minister of State for Railways Manoj Sinha chuan Assam MP Gaurav Gogoi-a zawhna a chhanah hmarchhak biala railway project 12 kalpuite chu sumdawnnaa hlawkpui tumna a nih loh thu leh mipuite dinhmun chawikan tumna a nih thu a sawi.

Nikum Union Budget khan hmarchhak biala organic farming tihchangtlun nan DoNER Ministry kaltlangin vaibelchhe 100 ruahman a ni a, hetihlai hian DoNER chuan cheng vaibelchhe 33 chauh a hmang thei thung. Kumin budget-ah organic farming atan hian vaibelchhe 125 ruahman leh a ni.