AFSPA hlih rawtna MHA-in pawm lo

Ministry of Home Affairs (MHA) chuan hmarchhak bial leh Jammu & Kashmir-a Armed Forces (Special Powers) Act, 1958 lekkawh mek hlip tura rawtna a pawm lo.

"Justice B.P. Jeevan Reddy committee chuan AFSPA chu mipuite dikna chanvo nekchepna a ni tiin hlih a rawt a, mahse hei hi hnawl tur a ni," tiin MHA chuan Prime Minister Narendra Modi-a kaihhruai Cabinet Committee of Security hnena report a thehluhah a tarlang.

Home Ministry official chuan AFSPA hlip tura Justice Jeevan Reddy committee rawtna chu hnawl turin Union cabinet an ngen thu a sawi bawk.

Defence Ministry pawhin AFSPA hlip tura rawtna hi a pawmpui lo a, hel hluarna hmunah sorkar sipaite chu AFSPA hian a venghim a ni, a ti.

Manipur a pawl hrang hrangte leh human rights activist Irom Sharmila-i'n AFSPA hlip tura nasa taka sorkar an nawr hnuah sorkar laipui chuan kum 2004 khan Supreme Court judge hlui, Justice Jeevan Reddy-a kaihhruaina hnuaiah AFSPA chungchang zirchiang turin committee a din a, Committee chuan June 6, 2005 khan phek 147-a chhah report thehlutin, Armed Forces (Special Powers) Act, 1958 chu hlih a rawt a ni.