AZSU-in rel kawng siamtute dan an tum

All Zeliangrong Students Union (AZSU) chuan Manipur, Jiribam-Tupul inkara rel kawng siam hna thawktu, construction company te dan an tum.

AZSU chuan thuchhuah a siamah construction company te chu a ṭha thei ang bera rel kawng siam tura an ngen thu a tarlang a, mahse company te hian an ngenna hi an tihpuitlinsak lo a ni, a ti.

Jiribam-Tupul inkara rel kawng siam hna hi Simplex Infrastructures Limited, Onycon Engineers Private Limited, ECI Engineering & Construction Limited, Bharti Infrastructures Projects Limited, Sushee Infrastructures Private Limited, Apex Construction leh SK Engineering & Construction India Limited te'n an thawk mek a ni.

AZSU hian ZSUM nen ṭangrualin rel kawng siam hna thawh mek hi nikum December khan a hmunah an endik a, lei dawh mek te, leiverh hna thawh mek te leh rel kawnga thir phah hna thawh mek te an endik a ni. AZSU chuan nikuma hna thawh dan enfiahnaah hian company ṭhenkhat te hnathawh chu an bungraw hman- lung, rod, cement leh balu quality a chhiat avangin a chhe hle, a ti.

Hemi chungchangah hian AZSU chuan Prime Minister Office leh Union Ministry of Railways hnenah memorandum thehlutin, hnathawktute hnathawh danah inrawlh tur leh hnathawh dan enpui turin an ngen.