Tripura-in central pay scale hmang dawn lo

Tripura Finance Minister Bhaul Lal Saha chuan state sorkar hnuaia hnathawkte chu fund a remchang a nih chuan 6th Central Pay Commission rawtna anga thla hlawh pek an nih tur thu a sawi a, mahse fund a remchang lo a nih chuan tihpuitlin theih a nih loh tur thu a sawi.

Congress MLA Gopal Chandra Roy-a'n assembly session-a zawhna a zawh chu Saha chuan ziaka chhangin sorkar hnathawkte pay scale chu 14th Finance Commission-in rawtna a siam tlawh­chhana siam a ni ang, a ti.

"Tun dinhmunah state sorkarin 6th Central Pay Commission rawtna angin sorkar hnathawkte hlawh a pe thei lo a, mahse state sorkarin hemi atan fund a dawng a nih chuan 6th CPC rawtna chu tihpuitlin a ni ang," a ti.

Hetihlai hian eptu hotu Sudip Roy Barman chuan Finance Minister thusawi chu lawmawm a tih loh thu sawiin, "Tripura-in Central Tax Head aṭangin cheng vaibelchhe 25,000 a dawng dawn a, 14th Finance Commission hun chhungin gap grant hnuai­ah sum tam tham tak a dawng dawn bawk a, eng vangin nge state sorkar chuan sorkar hnathawkte hamṭhatna atana 6th CPC rawtna puitlin a tum loh?" tiin a sawi.

Eptu hotu Barman-a thu sawi chu chhangin Finance Minister Saha chuan, "6th CPC rawtna kalpui turin state sorkar­in vaibelchhe 1,800 a mamawh belh a, tunah hian state sorkarin sorkar hnathawkte thla hlawh leh pension atan kum khatah cheng vaibelchhe 2,597 a hmang ṭhin," a ti.

Central tax aṭanga state sorkar chanvo hi 13th Finance Commission huna vaibelchhe 7,411.89 aṭangin 14th FC hunah vaibel­chhe 25,396-ah tihpun a ni. State sorkar chuan 14th FC rawtna angin non-Plan revenue deficit (gap grants)-ah cheng vaibelchhe 5,104 a dawng dawn a, non-Plan revenue deficit (gap grants) hi 13th FC hun laiin state sor­karin vaibelchhe 4,463 a dawng, tiin Saha chuan a sawi bawk.

"Tripura chuan major head pathum - Central tax, gap grant leh grant dang aṭangin 14th FC hunah cheng vaibelchhe 31,308 a dawng dawn a, mahse 14th FC-in Centrally-sponsored scheme hrang hranga state share a pek dan a tihdanglam avangin sorkarin senso danga sum a hman turah harsatna a tawk dawn a ni," a ti.

Tripura Finance Minister chuan Planning Commission aṭangin nikumah vaibelchhe 2,597 an dawn thu sawiin, mahse Planning Commission hi NITI Aayog-a thlak a nih tak avangin plan sum lo kalna tur hi ngaihtuah mek a ni, a ti.