Nagaland-ah swine flu khuahkhirh tawh
Nagaland sorkar chuan state chhunga swine flu (H1N1) natna vei pali an hmuhchhuah hnuah hri leng chu khuahkhirh tawh a ni, a ti.
State Health department official chuan natna hri leng chu khuahkhirh thei mahse inralring renga an awm thu a tarlang bawk.
Official chuan Dibrugarh, Indian Council of Medical Research (ICMR)-a enfiah tur blood sample 16 an thawn zingah pali chu swine flu natna vei an ni tih finfiah a ni, a ti a, natna vei mi pali te hi state pawn aṭanga Nagaland-a lut vek an ni, a ti.
Health department hnuaia Integrated Disease Surveillance Programme nodal officer Tiasunup Pongener chuan swine flu hrilengin Nagaland a thlen tawh avangin natna hri chu awlsam takin a ral mai dawn lo, a ti a, hei vang hian thli tam hun lo thleng turah mipuite chu inveng fimkhur turin a ngen.
Tiasunup chuan invenna dante chu khauh taka kalpui zel a nih tur thu sawiin, screening neih dawnah pawh district hospital tinte chu ICMR guidlines zawm ṭha hriattir an ni, a ti.
IDSP nodal officer chuan swine flu damdawi, Oseltamivir capsule chu health directorate-ah ṭhahnem tak a awm reng thu a sawi bawk.
State Health and Family Welfare Minister P Longon pawhin swine flu enkawlna damdawi chu an neih ṭhat thu sawiin, natna hneh turin theihtawp chhuah an tum thu a sawi.
"Swine flu natna hri leng hlauh avanga ralṭi taka mipuite an awm chu ṭha ka ti lo a, mipuite chu thlamuang taka an awm ka duh a, natna hri leng chu hneh theih a ni tih an inzirtir a ṭul a ni," a ti. Natna vei hmuhchhuah an nih chuan sorkarin treatment ṭha tak a pek tur thu a sawi.