Vistara-in NE-ah thlawhtheihna service tir dawn

Tata group leh Singapore Airlines ṭangkawp, Vistara chuan hmarchhak bialah thlawhtheihna service tir a tum thu a puang.

Vistara chuan April 2 aṭangin Delhi-Guwahati-Bagdogra-Delhi inkarah thlawhtheihna hi a service ṭantir ang.

Vistara chief executive Phee Teik Yeoh chuan, "Customer tam takin tun hnaiah hmar­chhak biala service pe turin min ngen nasa hle a, customer te thil phut tihhlawhtlinna atana Delhi-Guwahati-Bagdogra-Delhi inkara thlawh­theihna kan thlawh tir tur hi keini pawh kan lawm a ni," a ti.

"He kawnga kan thlawh­theihna service tur hian India ram state-te intlawhpawhna tihchangtlunna atana kan inpekna a tilang chiang hle a, mipuite hmasawnna atana sorkar kan thawhpuina tilangtu a ni," a ti.

Vistara hian Janua­ry khan kar khatah thlawh­theihna 68 thlawh tirin, service a ṭan a, February 20 leh March 1 khan Goa leh Hyderabad-ah thlawhtheihna a thlawh tir ṭan leh bawk. Tunah hian Airbus A-320 thlawhtheihna panga a nei mek a, kar khata thlawhtheihna 164 thlawh tir tumin hma a la mek bawk.