Arunachal loneitute'n power project an dodal

Arunachal Pradesh-a loneitu pawl, Siang Indigenous Farmers’ Forum (SIFF) chuan National Hydroelectric Power Corporation (NHPC Limited) leh North Eastern Electric Power Corporation

Limited (NEEPCO)-in Siang lui chunga power project atan lui an khuah chu an duh loh thu tarlangin, project chu tihtawp a nih loh chuan lungawi lohna lantir an tum thu an tarlang.

Siang lui chuanga power project pahnihah, pakhat aṭangin power megawatt 6,000 leh pakhat aṭangin megawatt 3,750 siamchhuak thei tura ruahman a ni a, mahse loneitute chuan tuikhuahin Siang chhehvelah nghawng ṭha lo a thlen thei dawn a ni, an ti.

SIFF president Tasik Pangkam chuan tuikhuah siamna atana memorandum of understanding (MoU) ziah a nih laiin a tuar tur ram neitute pawmpuina an la lo a ni, a ti.

SIFF hi pawl dang, Siang People’s Forum, Nyiko Banggo leh Siang Mebo Bachao Committee te pawhin thlawp an tum.

Arunachal Chief Minister hlui, BJP hotu Gegong Apang pawhin Siang luia tuikhuah siam tur chu a duh loh thu sawiin, loneitu pawlte chu a thlawp thu a sawi.

"Ganga lui thenfaina atana cheng tam tak hman a nih chuan Siang lui leh Brahmaputra lui zahawmna pawh humhim ni ve rawh se," a ti.