Manipur-in assembly-ah ‘Special ILP Bill’ pulut dawn

Manipur Cabinet chuan 'Special ILP Bill' chu state assembly-a putluh a nih tur thu tarlangin March 3, Thawhlehni-a budget session tihtawp tak chu pawhsei a tum.

Manipur-a inner line permit system kalpui phuttu, Joint Committee on Inner Line Permit System (JCILPS) chuan state sorkar chu tun hnaia budget session neihah khan ILP system bill pulut turin a phut a, state sorkarin a tihpuitlin loh avangin budget session tawp ni, Thawhlehni khan state sorkar lakah civil disobedience movement kalpui a tum thu a puang a, hemi hnu hian state sorkar chuan thutlukna thar a siam hi a puang a ni.

JCILPS hian minister leh MLA zawng zawngte chu ILP bill thlawp loah puhin, bang vek tura an phut thu an tarlang bawk.

JCILPS convenor Ibotombi Khuman chuan Manipur sorkar chu ILP system ngaihthahah a puh bakah ILP system kalpui phutna chu la thutak loah a puh bawk.

ILP system chung­chang bawhzuiin state sorkar chuan tun hnaia budget session neih ṭan hmain JCILPS hotute meeting a neihpuiah 'Manipur Visitors and Tenants Law 2015' a duan chu a tlangzarh a ni.

‘Special ILP Bill' putluh tur chungchang hi state sorkar thupuangtu, state Education Minister M Okendro chuan sawiin, Manipur-a pemlutte dan nan leh khuahkhirh nan state sorkar chuan ILP system emaw a tlukpui dan khauh tak siam a duh a ni, a ti.

"ILP Bill chu Financial Bill a nih avangin ngun taka ngaihtuah a ngai a, hei vang hian dan hre mi te leh mithiamte rawn pawh a ṭul a ni. ILP bill pass a nih hmain state sorkar chuan Manipur-a mi zawng zawngte duhdan a humhalhsak a ngai a ni," a ti.