Assam : Eptu pawlin CM bang turin an duh

Assam chhung hmun pariatah bomb kaihhnawih ni ngeia hriat hmuhchhuah a nih hnuin state chhunga eptu pawl pahnih, Congress leh Raijor Dal chuan chief minister Himanta Biswa Sarma chu bang turin an phut. State chhung himna venghim zo loah BJP sorkar chu an puh bawk.

Assam chhunga helpawl lian, United Liberation Front of Asom-Independent (ULFA-I) chuan state chhung hmun hrang hrangah bomb 24 an kam tih an sawi a, hemi hnu hian bomb lama mithiamte chuan a zawn hna hi an thawk zui a ni. ULFA-I hian khawl lam chian lohna vangin an bomb-te chu a puak ta lo niin an sawi.

Assam police-te hian bomb kam tak hmu lo mah se bomb kaihhnawih ni ngeia hriat hmanrua chu hmun riat laiah hmuchhuakin, eptu lam chuan hei hi sorkar lai beih nan an hmang zui ta a ni. Assam Congress president Bhupen Kumar Borah chuan buainaa Assam a tlu lut mai chu pawi a tiin BJP sorkar chu mawhphurhna hlen loah a puh.

Assam tualṭo party, Raijor Dal dintu leh MLA ni mek Akhil Gogoi chuan ULFA-I chetdan chu a dem takzet tih sawiin, hemi rual hian state chhunga venghimtuten bomb a awm a ni tih an hre mai lo chu mak a tih thu a tarlang. State chhunga boruak ralmuang a awm tir theih loh vangin CM Himanta chu bang mai turin an duh tih Gogoi chuan a sawi bawk.

Assam CM chuan nimin khan ULFA-I hotupa, Paresh Baruah chu state chhung tiralkhel zawnga che lo turin a ngen a, Assam-in hma a sawn zel theih nan boruak ralmuang awm a pawimawh tih a sawi. Hun rei tak chhung buainain a chiahpiah hnuah Assam chu a tho chhuak ve ṭan a ni a, hetianga remna tiderthawng zawnga chetna hi ṭhalaite hmasawnna dal thei thil a ni tih Sarma chuan a sawi bawk.