Remna kan neih theih nan thawihtawp kan chhuah : Manipur CM

Manipur chief minister N Biren Singh chuan tualchhung buaina aṭanga tal chhuaka, state ralmuang tak an nih leh theih nan a kaihhruai sorkar chuan theihtawp a chhuah tih a sawi. State chhung buaina a chhuah chhan chu pawn lam mi inrawlh an awm vang a ni, a ti bawk.

Chief Minister chuan an state chu state chhunga cheng hnam 34-te ta a ni a, hnam pakhat ta bik a ni lo tih a sawi. State ṭhen hran duhna chu dodal turin a sawm bawk. State chhung buaina chhuak chuan hmasawnna a tibahlah tih sawiin tualchhung buaina chhuak lo se an state chuan kawng tam takah nasa zawkin hma a sawn ngei a ring.

Manipur chuan buaina vangin hmasawn theihna hun ṭha tam tak bawhpelh tawh mah se Singh chuan ngai an awh leh theih a beisei. Hemi tur hian hna an thawk dawn tih a sawi bawk. State pawn aṭanga rawn lutte chu buainaa inhnamhnawihna nei an ni tiin, Manipur ṭhenhran tumah a puh bawk.

Remna an neih theih nan politics leh mimal thila an inhmuhthiam lohnate chu dah ṭhat a ngai tih CM chuan a sawi a, inpumkhatna leh thudik hmangin remna hi neih theih a ni, a ti. Inphiarrukna leh incho zawnga chet chu a rem tawh lo tih a sawi bawk. Sorkar chuan state chhunga raltlante tan theihtawp a chhuah tih sawiin chhawmdawlna an pek hrang hrangte a sawilang bawk a ni.