Arunachal : Mihring hmanga sumdawng ṭhin mi paruk man

Arunachal Pradesh chhunga mihring hmanga sumdawng ṭhin mi paruk chu Itanagar-ah man an ni. Heng mite hian tleirawlte chu tih luihnain an inzawrh tir ṭhin nia tarlan a ni.

Longding police-te chuan hmeichhia kum tling lo pakhat, he pawikhawihna tuartu hnen aṭanga complaint an dawn bawhzuiin misualte hi an man ta a ni. He hmeichhe naupang hian police hnenah misualten an bum dan a sawi bawk.

Hmeichhe naupang pawikhawihna tuartu chuan a tirah hna pangngai tak anga lang thawh tir an nih thu sawiin, hemi hnu hian misualte chuan an inzuar luih tir ta ṭhin niin a sawi. Hetiang thil hi Jullang hotel-a thawk hmeichhe dangte chungah a thleng ve tih a sawi bawk.

Pawikhawihna tuartu, hmeichhe naupang leh a ṭhian pakhat chu July thla khan misualte lak aṭang hian an tlan chhuak a, Longding police station-ah thubuai hi a thehlut ta a ni.

Arunachal chhungah hetiang pawikhawihna hi a thlen ṭum khatna a ni lo a, kumin May thla khan kum tling lo naupang, inzawrhluih tirtu misual 15 chu man an lo ni tawh. An zingah hian sorkar hnathawkte pawh an tel a ni.