Meghalaya : HSPDP-in ramri chungchanga inbiakna nei leh turin sorkar ngen

Meghalaya leh Assam sorkarin ramri buai chungchanga an inbiak thawh khatna an neih hnuah, Hill State People’s Democratic Party (HSPDP) chuan ramri chungchanga inbiakna thawh hnihna chu ṭan leh tawh turin rorellai, Meghalaya Democratic Alliance (MDA) an ngen.

HSDP hian chief minister Conrad K Sangma hnenah lehkha thawnin, kum 2022-a a ṭum khat nana inbiakna an neih ṭumin kum tam tak hnua ramri buai sector parukah inremna an nei thei chu lawmawm an ti a, mahse ramri chungchanga chinfel tur la awmte chinfel a nih theih nan thawh hnihna atan inbiakna neih a ngai tih an tarlang.

MDA sorkar chu ramri buai ching fel tura hma an laknaah lawmthu hrilhin inbiakna nei leh thuai se an duh tih an sawi bawk. Meghalaya CM-in ramri chungchanga inbiakna chu assembly session awm leh hmaa neih hman an tum thu a sawi tih HSPDP president, KP Pangniang chuan a tarlang.

Assam leh Meghalaya hian inbiakna mumal leh awlsam zawka kalpui theih nan regional committee an din a, Meghalaya-a regional committee chuan Assam hnenah lehkha pawimawh an thehlut thuai dawn niin a sawi. West Khasi Hills regional committee kaltlangin Meghalaya hian Langpih sector-ah khaw 54 chuang nghet takin an hauh niin minister Paul Lyngdoh chuan a lo sawi tawh a ni.