Assam-in vbch 12,688 hu UC thehlut lo March thlaah deptt te'n sum an lachhuak nasa

Sum leh pai relbawlnaa Assam sorkar hlawh­chhamna hrang hrang tun hnaiah hai lan zel a ni a, state sorkar chuan sorkar laipui aṭanga fund eng emaw zat a dawnah utilisation certificate (UC) a thehlut thei lo a, hetihlai hian fund eng emaw zat chu thil dangah pawhpen (divert) a ni bawk.

State Principal Accountant General Shantanu Basu-a report buatsaih Assam Tribune-in a lakchhuahah Assam sorkar sum relbawlnaa thil felhlel tam tak hailan a ni a, report chuan state sorkarin sorkar laipui aṭanga kum 2011-12, 2012-13 leh 2013-14 atana fund a dawn account receipt chipchiar leh grants-in-aid a dawn dan chipchiar tarlan a ni. State sorkar chuan he hun chhung hian cheng vaibelchhe 12,688.11 a senral aṭangin utilisation certificate 19,830 a thehlut lo.

AG official chuan UC-ah hian particular ṭhenkhat chu ziahhnan a awm a ti a, UC ṭhenkhat chu phuailuai taka thehlut a awm thu a sawi bawk. Basu chuan UC phuailuai lutuk leh vawi tam tak ziahhnan te chu pawm a harsat thu a report-ah a tarlang.

Principal Accountant General Basu chuan March thlaa sorkar department hrang hrang te'm sum tham tak an la chhuak chu ngaihṭhatthlak loh a tih thu a tarlang bawk. Kum 2004-05 leh 2013-14 inkarah March thla chhung ringawtin Assam-a sorkar department hrang hrangte chuan cheng vaibelchhe 62,164.54 an lakchhuah thu report chuan a tarlang bawk.

Sum a hmanna tur dik taka hman loh leh thil danga pawhpen chu financial rules palzutna a ni a, hei hi Assam sorkar buaina pakhat a ni tiin, department pali chauhin kum 2013-14 chhungin dan anga an sum hman tur, vaibelchhe 770.25 an pawhpen thu a tarlang bawk. Kum 2013-14 chhung hian secondary education department chuan dan palzutin cheng vaibelchhe 257.04 a pawtpeng a, higher education department-in vaibelchhe 126.43 leh social welfare department-in cheng vaibelchhe 274.49 a pawtpeng bawk.

Financial year inṭan­na aṭangin October thla thlengin treasury account-a sum tihkhaw­tlai a awm ziah bawk tiin AG report chuan a tarlang bawk a, heng account tihkhawtlaite hian sorkar inrelbawlna a ṭha lo lama a nghawng bakah hmalama huna sum leh pai hmanna relbawlnaah nghawng ṭha lo a thlen ṭhin a ni, a ti.

Assam Tribune tun hnai khan Principal Accountant General Basu report ṭhenkhat a tarlang tawh a, Assam sorkar chuan department hrang hrangte tana sum rua­hman aṭangin kum 10 chhungah vaibelchhe 86,000 a hmang hman lo.