Assam-ah swine flu vei panga hmuchhuak

Assam-ah swine flu (H1N1) natna vei panga an awm thu state Assembly session-ah Nilaini khan sawi lan a ni a, mahse natna veite dinhmun hi a hlauhthawn­awm lo tiin an sawi.

Congress MLA Ardhendu Kumar Dey zawhna chu Assam Health and Family Welfare Minister Nazrul Islam chuan chhangin, swine flu natna vei chungchang hi a sawi a, natna veite chu dinhmun hlauhawma an awm loh thu sawiin, natna vei panga zinga pakhat chu sipai a ni, a ti.

"Natna vei panga zing­a pahnih chu Guwahati-a awm an ni a, pathum chu Dibrugarh-a awm an ni a, damdawi ina dah hran an ni lo," tiin Health Minister Islam chuan a sawi.

Assam health minister chuan natna veite damdawi-ina an enkawl loh chhan sawiin, sorkar laipui guidlines chuan swine flu natna veite hi category thum - A, B leh C-in a ṭhen hrang a, category A leh B te chu damdawi-ina khung hran ngai a ni, a ti.

Natna hrileng chuan ziaawm lam a pan chho mek zel a, mahse natna dolet turin state sorkar chu inralring rengin a awm a ni, tiin a sawi bawk.

Hmarchhak state zing­ah swine flu natna vei hi Nagaland-ah pali hmuhchhuah an ni tawh bawk a, state dangah a vei an awm hriat a la ni lo.