Bangladesh mite a rukin India an lut: Rijiju

Union Minister of State for Home Affairs Kiren Rijiju chuan India ramah a ruka Bangladesh mi an luh thu Nilaini khan a tarlang.

Rajya Sabha-a MP Ranjib Biswal a zawhna ziaka chhangin Rijiju chuan Bangladesh mi phalna nei loa India-a lutte chu a ruka lut an nih ṭhin avangin an zat chhin­chhiah theih a ni lo, a ti.

Rijiju chuan Bangladesh mi phalna nei loa India-a chengte thawn­kir mawhphurhna leh thu­neihna chu sorkar lai­puiin Foreigners Act, 1946-a Section 3(2)(c) tlawh­chhanin state sorkar leh Union Territories Ad­ministration te hnenah a pek thu a sawi a, rampawn mite chungchang buaipuitu atan sorkar laipuiin Assam-ah Foreigners Tribunal 36 a din thu a sawi bawk.

"Report-in a tarlan danin kum 1985-2014 chhungin India rama phalna nei lo foreign mite thubuai 9,41,361 chu bawhzui a ni a, heng zing case 9,28,690 chu chinfel tawh a ni a, case 4,39,389 chu Foreigners Tribunal ngaihtuah atan dah a ni," tiin Rijiju chuan a sawi.

Foreigners tribunal chuan case 2,20,485 chuang a chingfel tawh a, heng zinga 33,015 chu kum 1971 hmaa pemlut, foreign tiin a puang a, 28,316 chu kum 1971, March 25 hnu lama Assam-a lut, foreigner tiin a puang bawk. Kum 1985-2014 chhungin phalna nei lo Bangladesh mi 2447 chu an rama thawnkir an ni, tiin Rijiju chuan report a tarlang bawk.

Rijiju chuan sorkar laipuiin kum 2013, June khan sorkar laipui chuan Assam-ah Foreigners Tribunal 64 din a nih tur thu a puang tawh bawk, a ti.

Bangladesh mi India-a luh la tumte dan nan venhimna khauh zawka kalpui a nih thu a sawi a, India-Bangladesh ramri venhim ṭhat lohna hmun 19-ah Border Security Force (BSF) chuan duty post an hawn thu a sawi bawk.

Ramri venhim nan sorkar laipui chuan BSF te hmanrua tihchangtlun a tum thu Union Minister Rijiju chuan a sawi bawk.