CBI-in Agartala-a Rose Valley office an dap

Central Bureau of Investigation (CBI) chuan Nilaini khan Agartala-a Rose Valley office an dap.

Rose Valley hi Tripura-a Non-Banking Financial Company (NBFC) lian berte zing a mi a ni.

CBI te hian Rose Valley offical te man an nei lo a, mahse lehkha pawimawh eng emaw zat an laksak.

Member paruk awmna CBI team te hian complaint an dawn bawhzuiin office hi an dap a ni. State sorkar chuan sum peipun tumte sum tam tham tak chingpen chung­changah CBI hnenah thubuai 32 a thehlut a, mahse CBI chuan chhui zui atan thu­buai pa­nga chauh a pawm­sak a, hemi hnu hian state sorkar chuan infor­ma­tion rintlak zawk pe lehin CBI chu an thubuai theh­luhte chhui turin a ngen leh a ni. CBI chuan Rose Valley laka state sorkarin thubuai a theh­luh hi chhui chiang tur­in thu­tlukna a siam ta a ni.

Hetihlai hian eptu party, Congress chuan NBFC hrang hranga sum peipung te'n an harsatna an thlenna atan grievance cell a hawng.

Eptu hotu Sudip Roy Barman chuan, "Grievance cell kan hawn chu mipuite an chhawr ṭang­kai hle a, NBFC te'n mi­puite an bum dan remchangah media kaltlangin kan la tlangzarh ang," a ti.

Barman chuan rorel lai party hruaitute chu Tripura-a chit fund company te ṭanpuituah a puh bawk.