Mipuiin pawngsualtua rinhlelh sawisa hlum

Ningani khan Nagaland, Dimapur-ah pawngsual duh loh avangin mipuiin kawng an zawh a, Central Jail-a tang pawngsualtua rinhlelh chu hnukchhuakin kawng an zawhpui a, mipuite sawisakna hliam tuar loin kawng lakah a thi zui a ni.

Pawngsualtua rinhlelh hi kum 35 mi, Syed Farid Khan a ni a, Bangladesh mi Nagaland-a phalna nei loa cheng niin an sawi.

Dimapur khuaah hian Ningani tlai khan district thuneitute chuan Criminal Procedure Code (CrPC) Section 144 tlawhchhanin curfew an puang nghal. Nagaland DGP L L Doungel pawhin Dimapur a tlawh nghal a, mi ṭhenkhat an man thu a sawi.

Pawngsual duh loh vanga kawngzawh hi Naga Students’ Federation (NSF) huaihawt a ni a, activist ṭhenkhatte chuan Bangladesh mite chenna-in leh sumdawnna hmun te pawh an suasam bawk.

Central jail-a duty police te chuan mipuite hi an dang thei lo niin an sawi. Jail-a an luh hnuah pawngsualtua rinhlelh Khan hi a thawmhnaw hak hlih sakin a kâwngah hruiin an thlung a, City Clock Tower lam panin kawng an zawhpui laiin an sawisa nghal zel bawk a ni.

Khan hi February 24-a Dimapur-a zirlai hmeichhe pakhat pawngsualah puh a ni a, NSF te chuan bail-a chhuahtir lo turin thuneitute an lo ngen tawh bawk.

Kawngzawhte hian Khan-a ruang hlawm tum police te pawh an lo bei bawk a, police mi eng emaw zatin hliam an tuar. Police te chuan mipuite hnawhdarh nan tharum an hmang zui a, silai mu ruak an hmehpuah bakah tiang hmangin pungkhawmte an hnawtdarh. Mipui thinrim hian Indian Reserve Battalion bus an hal bawk.

State sorkar chuan Dimapur-a thil thleng chu dan leh thupek hlawh­chhhamna a ni tih a pawm thu Home Commissioner Sentigyanger chuan sawiin, Nagaland Police te leh district thuneitute chak tawk lohna a ni, a ti.

Mipuite'n anmahni kuta dan an lekkawh theih chhan chu sorkar chak loh vang a ni, tiin sorkar chu thilthlenga a mawhphurtu a ni, a ti.

New Delhi-a cham mek Chief Minister TR Zeliang chuan a thawhpuite chu Ningani tlai khan cabinet meeting nei turin a hriattir nghal a, meeting chuan thilthleng chu High Level Inquiry Committee din a, chhuichian a rel.