Tuki-a'n assembly-ah vote-on-account a pharh

Arunachal Pradesh Chief Minister Nabam Tuki chuan Ningani khan state assembly-ah thla li chhunga atana state sum hman tura ruahman, vote-on-account a pharh.

Vote-of-account hi Financial year thar 2015-16 a, April aṭanga July thleng state sorkar senso tur a ni a, hemi rual hian Tuki chuan financial year 2014-15 atana Revised Budget Estimate a tlangzarh bawk.

Vote-on-account-ah hian plan atan vaibelchhe 371.22 ruahman a ni a, non-plan-ah cheng vaibelchhe 1415.08 rua­hman a ni bawk.

Finance portfolio changtu, Chief Minister Tuki chuan financial year thar aṭangin sorkar laipuiin state te hnena ṭanpuina sum pek danah kalphung thar a hman tur thu a sawi bawk.

"Centrally sponsored schemes (CSS)-a state sorkar leh sorkar laipui sum thehchhuak dan chu thlak danglam a ni dawn a, state sorkar te sum thawh tur tihpun a tum a ni," a ti.

Hetihlai hian Tuki chuan CSS-a state sorkar leh sorkar laipui sum thehchhuah turah kal dan thar chu tlangzarh a la nih loh thu a sawi a, 14th Finance Commission kaltlanga Arunachal Pradesh-in sorkar laipui ṭanpuina a dawn turah chuan thil thar tam tak a awm tawh a ni, a ti.

"14th Finance Commission-in Arunachal tana kum nga chhung (2015-20) a sum a rua­hmansak, cheng vaibelchhe 7,231 kan hmuh theih nan hian state sorkar chuan theihtawp chhuahin 14th FC hmin tumin, state harsatnate kan tarlang a ni," a ti.

Tuki chuan, "Kum 2014-15 annual plan outlay-ah vaibelchhe 4,915 kan dah a, Balance from Current Revenues (BCR) avangin annual plan estimate hi vaibelchhe 4,500 kan tlin hram a, cheng vaibelchhe 415-in kan tlin thei lo a ni," a ti.

Kum 2014-15 revised budget estimate aṭang­in non-plan revenue receipt hi cheng vaibelchhe 3080.87 a ni a, hetihlai hian revised budget estimate-a non-plan revenue expenditure chu vaibel­chhe 4482.87 a ni, tih Tuki chuan a tarlang bawk.

"Revised budget estimate-a non-plan revenue expenditure tam chhan hi sorkar hnathawkte thla hlawh tihpun a nih bakah DA 107%-a tihpun vang a ni a, pension tihpun a ni bawk a, Lok Sabha leh assembly intlanna senso bakah public distribution system atana sum sen pung vang te leh power leina atana sum sen pung vangte a ni," a ti.